Velkomin á heimasíðu SLAA á Íslandi (Sex and Love Addicts Anonymous), samtök fólks sem leitast við að ná bata frá ástarfíkn og kynlífsfíkn.  Við tölum ekki fyrir hönd SLAA samtakanna í heild sinni en þau eru með alþjóðlega vefsíðu á vefslóðinni http://www.slaafws.org

Við erum sjálfstæð nema í málefnum sem snerta samtökin í heild eða aðrar deildir.  Þessi síða er í umsjón samstarfsnefndar SLAA og hægt er að senda okkur persónulegar fyrirspurnir á netfangið slaaisland [hjá] gmail.com.

Fundir

Hér er fundaskrá fyrir SLAA fundi í Reykjavik og á Skype.

Neyðar- og upplýsinganúmer SLAA aftur komið í gagnið: 698-8702!

Ákveðið hefur verið að hafa aðeins eitt símanúmer í stað tveggja og er númerið 698-8702. Áfram er hægt er að fá upplýsingar með tölvupósti á slaaisland [hjá] gmail.com og þar getur fólk einnig óskað eftir símtali.

Tilkynningar

Nýr fundur: Mánudaginn 2. apríl verður fyrsti hugleiðslufundurinn hjá SLAA á Íslandi kl. 12:05 á neðri hæðinni í Tjarnargötu 20.

Kvennafundir SLAA eru nú klukkan 11:00 á laugardagsmorgnum í Tjarnargötu 20.

Búið er að færa bókarfundinn sem er föstudögum kl. 16:30 niður í Tjarnargötu 20. Allir velkomnir!

Skype fundir sem voru á mánudögum eru nú á þriðjudögum kl. 20:00.

Búið er að stofna nýja deild sem er með fundi á miðvikudögum kl. 18 í Tjarnargötu 20. Allir velkomnir!

Kvennafundir SLAA sem hafa verið á Laugardögum kl. 14 hafa verið fluttir í herbergi B og eru nú klukkan 10:30 á laugardagsmorgnum.

Félagar ætla að hittast kl. 20:00 laugardaginn 1. okt. á Héðinsgötu og skrifa saman sögurnar sínar. (16. sept. '11).

Félagar í SLAA hittast í Kaffistofu Samhjálpar á föstudögum kl. 16:30 til að lesa saman AA bókina (sjá fundir).  Allir velkomnir. (14. sept. '11)

Skype fundur er nú á mánudögum kl. 19:00. (9. apr '11)

Nýr SLAA fundur er á sunnudögum kl. 20:00 á Seyðisfirði. (9. apr '11)

ATH. FUNDIR SEM VORU Í BORGARTÚNI 6 ERU FLUTTIR AÐ HÉÐINSGÖTU 1-3 (sjá staðsetningu á korti hjá www.ja.is)

Ert þú SLAA félagi í bata?  Deildu reynslunni og sendu inn reynslusögu þína til slaaisland [hjá] gmail.com !

Um SLAA

SLAA (Sex and Love Addicts Anonymous) er félagsskapur karla og kvenna, sem hjálpa hvert öðru til að vera allsgáð.  Samtökin bjóða öllum þeim aðstoð, sem haldnir eru ástar- og/eða kynlífsfíkn og vilja losna úr viðjum hennar.  Þar sem allir meðlimirnir þekkja fíknina af eigin raun, skilja þeir hver annan og sjúkdóminn betur en flestir aðrir. Þeir vita hvernig líðan sjúkdómurinn veldur og hafa lært í SLAA hvernig sigrast má á honum.

SLAA er félagsskapur byggður á grunni tólf reynsluspora og tólf erfðavenja AA-samtakanna.  Eina skilyrðið fyrir þátttöku í SLAA er löngun til að losna undan áþján ástar- og kynlífsfíknar.  Hver deild er rekin með frjálsum framlögum meðlima og er opin öllum sem eru hjálparþurfi.

Nafnleynd

Nafnleynd er eitt af því sem batinn grundvallast á.  Þess vegna eru SLAA-fundir venjulega lokaðir þeim, sem ekki eru haldnir sjúkdómnum og vilja bara svala forvitni sinni.  En allir sem óttast að þeir eigi við þetta vandamál að stríða eru velkomnir – –með því skilyrði að þeir virði nafnleynd viðstaddra.  Við höldum trúnað og nefnum engin nöfn SLAA-félaga utan funda.  Nafnleynd er 12. erfðavenja SLAA.

Hvað er ástar- og kynlífsfíkn?

Við í SLAA teljum ástar- og kynlífsfíkn vera ólæknandi og stigversnandi sjúkdóm, sem þó megi halda niðri  eins og ýmsum öðrum ólæknandi sjúkdómum.  Þessi sjúkdómur getur birst í margvíslegum myndum, meðal annars sem:

• Áráttukennd þörf fyrir kynlíf.
• Algjört ófrelsi gagnvart annarri/öðrum manneskjum(m).
• Stöðugir dagdraumar eða hugsanir um ástarsambönd eða kynlíf.
• Einangrandi kynhegðun eins og sjálfsfróun, klám, gægjur og sýniþörf.
• Óhamið lauslæti, kaup á vændisþjónustu, skyndikynni, símakynlíf, notkun kláms á netinu o.s.frv.
• Kynferðislegar sjálfsmeiðingar eða misnotkun á öðrum.
• Kynferðislegt lystarstol.

Tilfinningaleg/kynferðisleg áráttuhegðun er til staðar, þegar ástarsambönd eða kynhegðun skaða í æ meira mæli starf, fjölskyldu og sjálfsvirðingu viðkomandi einstaklings.  Ástar- og kynlífsfíkn tekur á sig sífellt verri myndir, ef hún fær að þróast óhindrað.

Sumir ástar- og kynlífsfíklar álíta sig vera utangarðsmenn, öfugugga eða einfaldlega agalaust fólk, áður en þeir kynnast SLAA.  Aftur á móti telja aðrir, sem haldnir eru þessari fíkn, sig aðeins vera að sækjast eftir því sem þeir eigi heimtingu á eða því sem þeir eigi skilið af öðrum.  Þeir eru sannfærðir um, að hömluleysi sé sjálfsagður réttur þeirra.  Það er skoðun SLAA-samtakanna, að ástar- og kynlífsfíklar séu að glíma við alvarleg veikindi en geti náð ágætum bata með því að fylgja einföldum leiðbeiningum, sem leitt hafa til góðs árangurs hjá fjölmörgum körlum og konum með sama sjúkdóm.

Inngangsorð SLAA

SLAA er félagsskapur byggður á grunni tólf reynsluspora og tólf erfðavenja AA-samtakanna.

Eina skilyrðið fyrir þátttöku í SLAA er löngun til að losna undan áþján ástar- og kynlífsfíknar.  Hver deild er rekin með frjálsum framlögum félaga og er opin öllum sem eru hjálparþurfi.

Til að sporna gegn hinum mannskemmandi afleiðingum ástar- og kynlífsfíknar beitum við fimm meginúrræðum:

1. Fráhald. Við höfnum daglega því hegðunarmynstri okkar, sem við höfum sjálf skilgreint sem vandamál.

2. Trúnaðarmennska / fundir. Við þiggjum fúslega þann stuðning, sem okkur býðst innan SLAA.

3. Reynslusporin. Við vinnum sporin tólf til að verða kynferðislega og tilfinningalega allsgáð og halda sjúkdómi okkar niðri.

4. Þjónusta. Við endurgjöldum öðrum SLAA-félögum það, sem samtökin hafa gefið okkur af svo miklu örlæti.

5. Andleg vakning. Við þróum vitundarsamband við mátt æðri okkur sjálfum, sem leiðir okkur áfram og styrkir í bataferlinu.

SLAA-samtökin tengjast engum félagsskap öðrum, pólitískum, trúarlegum eða hugmyndafræðilegum, og taka ekki afstöðu til annarra málefna en sinna eigin.  Við erum á hinn bóginn sameinuð í vilja okkar til að takast á við kynferðislegan og tilfinningalegan fíknivanda okkar.

Öll höfum við glímt við hegðunarmynstur, sem einkennist af áráttu eða þráhyggju.  Þessi sameiginlega reynsla gerir muninn á kynferði okkar og kynhneigðum að aukaatriði.

Við þurfum sérstaklega að vernda nafnleynd allra SLAA félaga.  Einnig reynum við að forðast að draga óþarfa athygli að SLAA í heild sinni í opinberum fjölmiðlum.